Кипрда беренче Сабан туена йөзгә якын татар кешесе килгән

Лаеш районы делегациясе беренче тапкыр Кипрда Сабан туе үткәрде. Бәйрәмдә Ларнак, Никосия, Пафос, Лимасол шәһәрләрендә яшәүче татарлар катнашты. Сабан туена йөзгә якын татар кешесе җыелды. Бу хакта Лаеш районы матбугат хезмәте хәбәр итә.

Элегрәк ватандашларыбыз Татарстан Хөкүмәтенә Сабан туе үткәрүдә ярдәм итү үтенече белән мөрәҗәгать иткән иде. Лаеш районы муниципалитеты белән Кипр татарлары арасында электән дустанә мөнәсәбәтләр урнашуын исәпкә алып, Лаеш районы делегациясен Лимасолга җибәрергә карар кабул ителде.

Алар традицион уеннарында – капчык киеп йөгерү, кашыкка йомырка салып йөгерү, аркан тарту, күзләр бәйләнгән килеш чүлмәк ватуда ярыштылар. Шулай ук Кипр татарларының «ластылар киеп әтәч тоту» уенын да уйнадылар. Балалар өлкәннәр белән беррәттән уеннарда катнашты. Лаеш районы артистлары бәйрәм кунакларына концерт күрсәтте.



Лаеш районы мәдәният бүлеге җитәкчесе Илнур Гайниев Кипрның татар җәмәгатьчелеге лидерлары Алсу Җиһангировага һәм Айгөл Михневичка Лаеш районы башлыгы Рәхмәт хатларын тапшырды.

Хирург Камил Галимов 15 ел инде Кипрда яши. Аның сүзләренә караганда, туган илеңнән еракта яшәгәндә тел һәм милләтнең, гореф гадәтләрнең кеше өчен иң кыйммәтле нәрсәләр икәнен күбрәк аңлый башлыйсың. «Мин рәхәтләнеп Кипрның башка шәһәреннән Сабан туена килдем, чөнки татар җырлары һәм биюләрен сагындым. Бу халык бәйрәме минем өчен саф һава кебек кирәк», - дип өстәде Галимов.

Кипрда яшәүче Гөлнара Хөсәенова тумышы белән Лаеш районының Атабай авылыннан булып чыкты. Ул Лимасол шәһәрендә 13 ел яши.

("Татар-информ")