Кемеровода прокуратура коткаручыларның янгындагы гамәлләрен тикшерә

Кемерово прокуратурасы янгын корбаннары туганнарының мөрәҗәгатен тикшерә. Алар коткару хезмәтләре сәүдә үзәгендә янгын вакытында үз эшләрен тиешле рәвештә башкармады, шунлыктан корбаннар күп булды дип саный.

Прокуратурага өч мөрәҗәгать килгән, шул исәптән янгында кызын, киленен һәм өч оныгын югалткан Игорь Сабадаш һәм Надежда Востриковадан да, дип яза "Интерфакс".

Алар коткаручыларның һәм полициянең үз эшләрен тиешле дрәҗәдә башкармаулары күп корбаннарга китерде дип саный.

Надежда Вострикова сүзләренчә, янгын көнне аңа кызы шалтырата һәм кинотеатр залында бикләнеп калуы турында әйтеп, коткаруын сорый. Берничә минуттан Надежда Вострикова сәүдә үзәгенең дүртенче катында була һәм янгын сүндерүчеләрдән тезләнеп ярдәм сорый. Ләкин алар кинозалга керүдән баш тарта, коткаручы төркемне көтәргә кирәк дип белдерә. Вострикова сүзләренчә, ул вакытта кинозалга әле ут капмаган, балаларны коткару мөмкинлеге була.
https://www.azatliq.org/a/29132258.html