Казанның өч урамында яңа муниципаль парковкалар эшли башлый

Казанда 3 июньнән Спартак, Җимешле һәм Николай Ершов урамнарында (8 нче йорт буйлап) яңа муниципаль парковкалар эшли башлый. Аларда 105 машина урыны булдырылачак, шуларның 12 се – инвалидлар өчен, дип хәбәр итә мэрия. Моннан тыш, Тихомирнов урамыннан борылганда юл хәрәкәте куркынычсызлыгын тәэмин итү максатыннан Т.Миңнуллин урамындагы муниципаль мәйданчыкта парковка урыннары өлешчә бетерелде. Участокта 1 июньнән «Туктап тору тыела» һәм «Эвакуатор эшли» юл билгеләре пәйда булачак, дип хәбәр иттеләр Казан шәһәре Башкарма комитетының транспорт комитетында. Исегезгә төшерәбез, муниципаль парковкалар ял һәм бәйрәм көннәрендә бушлай эшли. Эш көннәрендә түләү 8:00 дән 19:00 гә кадәр алына. Фото: kzn.ru, Денис Гордийко Источник: https://tnv.ru/tat/news/kazan/393863-kazanny-ch-uramynda-ya-a-munitsipal-parkovkalar-eshli-bashlyy/