Казанда яшәүче пенсионер апа фатирын сатып, мошенникларга 5 миллион сум акчасын күчергән

Казанда мошенниклар 68 яшьлек пенсионер хатыннан 5 миллион сум акчасын алганнар. Барысы да телефон аша сөйләшү вакытында килеп чыга. Шундый яңалык белән Татарстан Эчке эшләр министрлыгының матбугат хезмәте бүлеште. Пенсионер хатынга билгесез номер буенча шалтыратканнар һәм аның белән хокук саклау органнары хезмәткәрләре дип танышканнар. Янәсе, алар хатын-кызның шәхси счётыннан акчаны чит номерга күчерүче кешеләрне тоткарлаганнар. Зыян күрүче белән банкта «эшләүчеләр» дә элемтәгә чыга һәм акчаны "тикшерелгән" счётка күчерергә тәкъдим итә. Боларга ышанып, пенсионер мошенникларга 700 мең сум акча күчерә. Алай гына түгел, мошенниклар сүзенә ышанып, хатын-кыз үз фатирын сатып, шул акчаның яртысын счётка, икенче өлешен аның янына килгән курьерга бирә. Шулай итеп, ул 5 миллионнан колак кага. Фото: pixabay Источник: https://tnv.ru/tat/news/tatarstan/326420-kazanda-yash-che-pensioner-apa-fatiryn-satyp-moshenniklarga-5-million-sum-akchasyn-k-cherg-n/