Хельсинки тамашачысы "Мулла" фильмын югары бәяләгән

Татарстанда төшерелгән "Мулла" фильмын Россия киносы көннәрендә Хельсинки тамашачысында зур кызыксыну тудырган. Тамашачы фильмны татар тормышын күрсәткән милли әсәр дип бәяләгән. Бу хакта "Татар-информ" хәбәрчесенә фильмның продюсеры Миләүшә Айтуганова хәбәр итте.

"Мулла» фильмы инглиз субтитрлары белән Хельсинкида Россия киносы көннәрендә күрсәтелде. Кинокартинаны тамашачыга аның продюсеры, «Татаркино» оешмасы директоры, Казан кинофестивале башкарма директоры Миләүшә Айтуганова тәкъдим итте.

"Безнең фильмга 300ләп тамашачы килде. Алар арасында кырыклап татар кешесе, бер өлеше руслар булса, күбесе биредә яшәүче халыклар иде. Финляндиядә ислам темасы актуаль. "Мулла" фильмы шул яктан кызыксыну тудырган. Соңыннан очрашу сәгать ярымга сузылды. Бик күп сораулар бирделәр", - ди Миләүшә Айтуганова.

Россия киносы көннәре программасы кысаларында Россиянең "Собибор" фильмы, күп кинофестивальләрдә уңыш казанган "Царь-птица" саха фильмы да күрсәтелгән. Әмма "Мулла" фильмы аларга караганда өч-дүрт тапкыр күбрәк тамашачы җыйган.

"Мулла" фильмы Туфан Миңнуллинның шул исемдәге пьесасы буенча төшерелде. Режиссерлар - Рамил Фазлыев, Әмир Галиәскаров. Продюсерлар - Миләүшә Айтуганова, Марат Әхмәтшин. Фильм Әтнәдә төшерелде.  

("Татар-информ")