Фирдус Тямаев коллегаларына: 10 мең сум акча биреп кенә солдат күңелен җылытып булмый

Фирдус Тямаев һәм аның егетләре СВО башланганнан бирде хәрби егетләребезгә ярдәм итеп торалар. Бүгенге көндә аның концерт машинасы 25 тапкыр хәрби бәрелешләр зонасында булып кайткан, концертлардан кергән 6 миллион сум акчасын бүлеп биргән. Әмма башка артистлар, бүгенге көндә, СВО темасын күтәрми, ди Фирдус.

"Махсус хәрби операция дигән сүз чыккач, күп артистлар "Z" дигән тамга астында катнашмадылар. Май бәйрәменә мине Казандагы концертка чакырдылар, бәямне әйттем. Без риза, тик артта "Z" торачак. Күп артистлар ризалашмады, сез каршы түгелме?" Болар безнең Президентның сүзен акламыйлар кебек килеп чыга. Бүгенге көндә СВО темасын бер артистның да күтәргәне юк. Беркемнең дә байрак күтәргәне юк. Артык сүз булмасын өчен, нәрсәдер эшләгәннәре бар - Хәйрия концертларын оештыралар. 10 мең сум акча биреп кенә солдат күңелен җылытып булмый. Патриот булсаң - патриот булырга тиешсең. Минем дә өч балам бар, үз тормышым. Аллаһ тәгалә акча биргән икән, син ятим балаларга да, илне яклаган егетләргә дә ярдәм итәргә тиешсең. Ничек инде? Минем энекәшләр ач ята, сулары, киемнәре юк! Ә без монда рәхәттә, балда-майда яшибез. Алар без матур, тыныч яшәсен өчен күкрәкләрен куялар", - дип сөйләде җырчы. 

"Мобилизация башлангач миңа берничә артист шалтыратты. "Без афиша элдек, ә халык илдә шундый вакыйгалар булганда сез концерт куеп ятасыз дип сүгә", дип шалтыратты. Теләсә нәрсә эшләгез, минем күңелем чиста, дидем. Мин афишаны куям, чөнки концертларымнан кергән 20-30% егетләргә ярдәмгә китеп бара. Бүгенгә ул сумма 6 миллионнан артып китте. Бу әле концерттан гына. Алдый торган хәл түгел бит. Һәрбер җибәргән әйбернең чегы, видеосы, егетләрдән рәхмәт хатлары бар. Бергә икән бергә - артка чигенү юк!", - дип белдерде Татарстанның атказанган артисты.

"Мин үзем бер генә тапкыр булдым. Снежное шәһәрендәге спецназ егетләр янына бардым. Бер генә тапкыр булдым, чөнки миңа монда эшләп, ярдәм итеп торырга кирәк. Андагы хәлләрне күрдем. Шуны беләсем килә - без бай, матур, рәхәт тормышта яшибез. Анда кешеләрнең суларын да агулыйлар", - диде ул.