Дәүләт торак фондының элеккеге башлыгы Тәлгать Абдуллинның яңа эш урыны билгеле

Татарстан Президенты карамагындагы Дәүләт торак фондының элеккеге башлыгы Тәлгать Абдуллин “Связьинвестнефтехим” акционерлык җәмгыятенә эшкә күчә. Әлеге мәгълүматны компаниянең кабул итү бүлмәсендә расладылар.

Шул ук вакытта “Связьинвестнефтехим” җәмгыятендә Тәлгать Абдуллинның нинди вазифа биләячәген һәм кайчан эшкә керешәчәген ачыклап әйтмәделәр.

Татарстан Президенты Рөстәм Миңнехановның Татарстан Дәүләт торак фонды җитәкчесе Тәлгать Абдуллинны вазифасыннан азат итүе 12 октябрьдә билгеле булды. Аның урынын элек Татарстан Республикасы Тарифлар буенча дәүләт комитетын җитәкләгән Марат Зарипов алды.
“Связьинвестнефтехим” АҖ Татарстан Министрлар Кабинеты карары нигезендә 2003 елның апрелендә оештырылды. Холдингның бурычы - Татарстанның әйдәп баручы предприятиеләре дәүләт акцияләрен нәтиҗәле куллану хисабына республика икътисадында инвестицион процессны стимуллаштыру. Хәзерге вакытта җәмгыятьнең устав капиталы 57,4 млрдтан артып киткән.

("Татар-информ")