Депутатлар даруларга бәя күтәрүне тыярга тәкъдим итте

Дәүләт Думасында даруларга бәя күтәрелүне тыярга тәкъдим иттеләр. Авыруның кискен чоры башлану белән даруханәләрдә бәя күтәрергә ашыгалар. Бу иммунитетны ныгыту, вируска каршы препаратлар мисалында ачык чагыла, ди депутатлар.

Соңгы мисал итеп алар Кытайдан килгән коронавирус таралу фонында даруханәләрдә медицина битлекләренә бәя артуны атады. Быелның гыйнвар аенда интернет кибетләрендә медицина маскаларын сату 10 тапкырга артты. Моның сәбәбе, беренче чиратта, короновирус таралуы. Моннан тыш, кулны чистарту өчен антисептиклар бик популяр.

Сәламәтлек саклау министрлыгы Россиядә коронавирус таралуга әзерләнә. Әлегә ил территориясендә төгәл фараз бирә алмыйлар. Әмма Сәламәтлек саклау министрлыгы коронавирус югары тизлек белән таралачак дигән фикердә. Кытайда яңа төр вирустан 420  кеше үлгән, ә чир йоктыручылар саны 20 меңнән артып киткән. Россия чиге аша барлык пунктларда икеләтә контроль үткәрелә.

Искәртеп үтик, Россия Кытай белән чикләрне япты, транспорт элемтәсен чикләде.

("Яңалыклар" хезмәте)