Давылдан һәлак булган һәм имгәнгән татарстанлыларның гомуми саны билгеле

Татарстанда яшәүче 9 кеше давыл чыгу сәбәпле һәлак булган һәм республиканың 47 кешесе төрле җәрәхәтләр алган. Бу хакта «Татар-информ» мәгълүмат агентлыгына Республика һәлакәтләр медицинасы үзәгендә хәбәр иткәннәр. Медицина хезмәткәрләре мәгълүматлары буенча, Марий Элдагы Яльчик күле янында давыл котырган вакытта Татарстаннан 8 кеше һәлак булган, алар арасында өч бала да бар. Татарстанның 21 кешесе төрле дәрәҗәдәге җәрәхәтләр алды, шуларның дүртесе – балалар. Яльчик күлендә зыян күрүчеләр турындагы мәгълүмат түбәндәгечә: анда зыян күргән 21 татарстанлының 7се хастаханәдә дәвалана. 4 кеше Республика клиник хастаханәсендә ята, аларның икесе авыр хәлдә, икесенең сәламәтлеге уртача авыр хәлдә дип бәяләнә. Бер бала Балалар республика клиник хастахнәсендә дәвалана. Аның хәлен уртача авыр дип бәялиләр. Марий Элда давылдан зыян күргән бер кеше Казанның 7нче хастаханәсендә, ул да авыр хәлдә. Сәламәтлеге уртача авыр хәлдә дип бәяләнгән тагын бер пациент Яшел Үзән Үзәк район хастаханәсенә китерелгән. Моннан тыш, Һәлакәтләр медицинасы үзәге мәгълүматлары буенча, 29 һәм 30 июльдә Казанда яшәүче 14 кеше Яльчик күле янында давыл вакытында алган төрле җәрәхәтләр белән мөрәҗәгать иткән. Аларның алтысы Казанның 7нче хастаханәсенә, бишесе Казанның Яңа Савин районы травмпунктына, өчесе Республика клиник хастаханәсенә килгән. Аларның барысына да тиешле медицина ярдәме күрсәтелгән, шуннан соң алар амбулатор дәвалануга җибәрелгән. Давыл нәтиҗәсендә Татарстан территориясендә 14 яшьлек кыз да һәлак булды. Ул әти-әнисе белән Лаеш районында табигатькә ял итәргә чыккан булган, аларның палаткасына агач төшкән. 26 кеше төрле җәрәхәтләр алган, аларның икесе уртача авыр хәлдә Казанның 7нче хастаханәсенә озатылган. Фото: "Татар-информ" Источник: https://tnv.ru/tat/news/tatarstan/335140-davyldan-lak-bulgan-m-img-ng-n-tatarstanlylarny-gomumi-sany-bilgele/