Быел Казанда Белем бәйрәме 2 сентябрьдә була

Быел Белем көне дүшәмбе, 2 сентябрьдә узачак. Бу хакта Казан мэриясендә узган эшлекле дүшәмбе киңәшмәсендә билгеле булды.

«Без Белем көнен 2 сентябрьдә үткәрергә киңәш итәбез. Әмма һәр белем бирү учреждениесе мөстәкыйль карар кабул итәчәк: теләсәләр — 1 сентябрьдә үткәрерләр, теләсәләр — икесендә, чөнки 1 сентябрь ял көне була», -  дип сөйләде Мәгариф идарәсе җитәкчесе Илнар Һидиятов.

Аның сүзләренчә, быел Казан мәктәпләренә беренче тапкыр 19 мең беренче сыйныф укучысы барачак, 120 меңгә якын мәктәп укучысы каникуллардан килә.

Элегрәк «Татар-информ» мәгълүмат агентлыгы хәбәр иткәнчә, Татарстан Мәгариф һәм фән министрлыгы республика мәктәпләренә Белем көнен 1 сентябрьдә үткәрергә тәкъдим иткән, ул быел якшәмбегә туры килә.

«Уку елын 1 сентябрьдә башлау теләге - ата-аналарга һәм балаларга, гаиләләргә тулы составта бу бәйрәмгә килергә мөмкинлек бирү. Бу уку елына яхшы омтылыш булыр иде», - диде Татарстан мәгариф һәм фән министры Рафис Борһанов.

("Татар-информ")