«Безнең җыр» лабораториясенең беренче этабына йомгак ясалды

«Калеб» яңа буын җыены «Безнең җыр» лабораториясенең беренче этабына йомгак ясады. Ике көн дәвамында экспертлар һәм «Калеб» иҗатчылары яңа буын татар эстрадасы җырларын тыңлап бәя бирделәр.

«Безнең җыр» лабораториясенә май аенда старт бирелде. Яшь иҗатчылар бер шагыйрь, бер композитор һәм бер җырчыдан торган өчәр кешелек командаларга берләшеп билгеләнгән вакыт эчендә җыр иҗат итәргә тиешләр иде. Дөрес, һәрберсе күп төрле проектлар белән эш итүче иҗатчылар билгеләнгән вакыт эченә сыеша алмадылар, тулысынча әзер композицияләр аз иде.

Лабораториянең беренче эшләре Кариев театры залында тәкъдим ителде. Җырларны экспертлар – Татарстанның халык артисты, педагог, хормейстер Венера Гәрәева, шагыйрә Илсөяр Иксанова, радио алып баручысы Ризәлә Исмәгыйлева, музыка белгече Гөлназ Гыйлемьянова бәяләде. Залда музыка белгече Филүсә Арсланова да, «Sforzando» башкару сәнгатен үстерү фонды җитәкчесе Данияр Соколов һәм күренекле музыкант Айдар Сәлахов та бар иде.

Экспертлар җыр текстларының сыйфаты, көй белән шигырьнең ярашуы, җырчының аны тамашачыга җиткерү мөмкинлеге турында фикерләрен җиткерделәр. Кайбер җырларга экспертлар тарафыннан «татарча түгел» дигән мөһер дә сугылып киңәшләр бирелде.

Икенче этапта өчлекләр яңадан бүленде һәм җыр әзерләү өчен бер ай вакыт бирелде.

«Безнең җыр» лабораториясенә нәтиҗәләр көз көне ясалачак. Октябрь, ноябрь айларында оркестр катнашында зур концерт планлаштырыла.

("Татар-информ")