Беренче балага пособие күләме киләсе елга гыйнвар аеннан арта

Беренче бала туганнан соң аналарга федераль пособие күләме 2020 елның 1 гыйнварыннан 8,8 меңнән 9,3 мең сумга кадәр артачак. Моннан тыш, аны исәпләү тәртибе дә үзгәрәчәк. Бу хакта «Татар-информ»мга Татарстаннан Россия Дәүләт Думасы депутаты Ольга Павлова хәбәр итте.

Беренче бала тууга бәйле рәвештә айлык түләүләр җан башына уртача керем яшәү минимумының бер ярым тапкыр күләменнән артмаган гаиләләргә 2018 елдан күчерелә. Хәзер түләү күләме 8,8 мең сум тәшкил итә.

2020 елның 1 гыйнварыннан түләү гаиләнең җан башына уртача керем һәр гаилә әгъзасына ике яшәү минимумыннан артмаган очракта биреләчәк.

«Татарстанда җан башына уртача кереме 20,1 мең сумнан артмаган гаиләләргә түләү 9,3 мең сум күләмендә биреләчәк. Моннан тыш, Татарстанда авылда кимендә өч ел яшәүче хатын – кызларга бер тапкыр бирелә торган түләүләр карала», - дип аңлатма бирде Павлова.

Татарстан Хөкүмәте карары нигезендә, 25 яшькә кадәрге авыл хатын-кызларына беренче балалары туганда 50 мең сум акча түләнә. 29 яшькә кадәрге хатын-кызларга өченче бала туганда100 мең сум акча түләү каралган.

2020 елның 1 гыйнварыннан Татарстан Президенты күрсәтмәсе буенча күп балалы гаиләләр өчен өстәмә социаль ярдәм чаралары гамәлгә кертеләчәк. Аерым алганда, биш һәм аннан да күбрәк балалы гаиләләргә айлык пособие каралган. Ул аларның җан башына керем дәрәҗәсен яшәү минимумына кадәр җиткерергә мөмкинлек бирә.

Күп балалы гаиләләргә дарулар сатып алу өчен елына 10 мең сумлык электрон сертификатлар биреләчәк.

("Татар-информ")