Азнакайда Диализ үзәге ачылды

Азнакай шәһәрендә элеккеге поликлиника базасында Диализ үзәге ачылды. Үзәктә бөерләре җитди авырулы 35 кеше дәваланачак. Бу турыда район басмасы хәбәр итә.

2000 елларда районда гемодиализ авырулы 5 кеше дәвалануга Бөгелмәгә йөрү өчен транспортны район үзәк сырхауханәсе бирде. Авырулар саны елдан-ел арта барып, бу мәсьәләдә кыенлыклар килеп туды.

Шуннан чыгып, 2012 елдан «Үсеш» («Развитие») шәфкатьлелек фонды һәм «HD заманча медицина клиникасы» амбулатор гемодиализ үзәге транспорт арендалауда матди ярдәм күрсәтүгә алынды. Фонд тарафыннан бу максатка 5 481 701 сум акча бирелде.

Аны ачу тантанасында район башлыгы Марсель Шәйдуллин, район башкарма комитеты җитәкчесе Айдар Шәмсетдинов, район үзәк сырхауханәсе баш табибы Илдар Шиһапов, инвестор Фәнис Гыйләҗетдинов катнаштылар.

Биредә 10 аппарат куелган, киләчәктә аларның санын тагын да арттыру күздә тотыла. Авырулыларга югары технологияле медицина хезмәте алу, ял итү, санитария-гигена таләпләрен саклау өчен барлык уңайлы, заманча шартлар тудырылган.

Үзәкне ачуга инвестор тарафыннан 80 миллион сумнан артык акча тотылган. Пациентларга уңайлы шартлар тудыру, алга таба дәвалануны дәвам итү өчен җирле бюджеттан да 1 миллион сум акча бүлеп бирелде.