Андрей Кондратьев Татарстанда тавыш бирүнең беренче көненә нәтиҗә ясады

(Казан, 11 сентябрь, «Татар-информ»). Бүген иртәнге сигездә Татарстанда сайлау участоклары ачылды. Кичке алтыга сайлаучыларның гомуми санының 24,4 проценты тавыш бирде. Республикада тавыш бирүнең беренче көненә нәтиҗәне Татарстан Үзәк сайлау комиссиясе рәисе Андрей Кондратьев ясады.

«Без структура ягыннан гади булмаган сайлау кампаниясе уздырабыз. Бездә Татарстан Президентын, җирле үзидарә органнары депутатларын, Россия Дәүләт Думасына һәм Татарстан Дәүләт Советына өстәмә сайлаулар уза. Бүген иртәнге сигездә 2,8 мең участок сайлау комиссиясе ачылды. Алар, һичшиксез, үз вазифаларын башкаруга әзер», — диде ул.

Кондратьев тавыш бирүнең штатлы режимда булуын, республикада 2,9 млн кеше сайлау хокукына ия булуын әйтте.

Мобиль сайлаучы механизмын 17 меңнән артык кеше кулланган. Мәскәүдә булган гражданнар да бу ысулны файдаланган.

«Кичке алтыга республикада сайлачуыларның гомуми санының 24,4 проценты тавыш бирде. Сайлау кампаниясе актив бара дип саныйм. Бөтен сайлаучыларга да активлык өчен рәхмәт», — диде Андрей Кондратьев. 

ТАТАР-ИНФОРМ
Фото: Владимир Васильев