Ананың исеме – Клара, баланыкы – Адольф, ә фамилияләре – Гитлер

Бер хатынның баласы кызамык белән авырып авыр хәлдә ята икән. Табиб иртәнгә кадәр җан бирмәсә, бәлки терелер дигән. Ана бу баласына кадәр инде өч сабыен җирләгән булган. Шуңа аның җаны тетрәвен аңлап-аңлатырлык түгел.

Ул, ике көн йокламыйча, баласын үлән суларында коендырып, Ходайдан сабыен сәламәтләндерүен сораган. Һәм, ни гаҗәп, малайның температурасы төшә башлап, ул күзләрен ачкан.

 Ананың исеме – Клара, баланыкы – Адольф, ә фамилияләре – Гитлер.

 Күршеләрнең уллары, инде өйләнгәч, үз-үзенә кул салган иде. Хатынының әллә ни күз яше түккәнен күрмәдек. Начар яшәгәннәрдер бәлки. Ә яшь ирнең әтисе бу кайгыны күтәрә алмады, бер айдан гүр иясе булды. Әниләре әле дә ялгызы яшәп ята. Бу хәлләргә инде күп еллар үтте. Әлеге гаиләне яхшы белгән танышым беркөнне: “Әле ярый Р.не Ходай үз янына алды, көн күрсәтми иде ул Рәзиләгә”, – диде. Бәлкем, чыннан да, югалтуларны, авырлыкларны сабырлык белән кабул итәргә кирәктер. Нәрсәнең хәерле, ә нәрсәнең хәерсез икәнен бер Аллаһ кына белә бит. 

матбугат