Элвин Грейның Азнакайдагы концертыннан 500 кешене эвакуацияләгәннәр

Элвин Грейның Азнакай мәдәният йортында узган концертыннан 500 кешене эвакуацияләгәннәр. Бу хакта "Татар-информ"га концерттагы кешеләр хәбәр итте.

Концерт башлангач, 20.30 сәгатьтә мәдәният йортында бомба бар дип шалтыратканнар. Экстрен хезмәтләр килеп, кешеләрне урамга эвакуацияләгән. Бинаны кинологлар тикшергән. Концертка килүчеләрне кайтарып җибәргәннәр.

"Безнең барыбызны да өстәмә ишектән эвакуацияләделәр. Этләр кертеп җибәрделәр. Дөрес мәгълүматмы-юкмы, белмибез.

Беренче тапкыр шундый хәл. Концертны туктаттылар да бөтен зал урамга йөгереп чыкты.

Барысы да паникада, барысы да машиналарга утырып кайттылар. Барысы да әйбәт булыр дип өметләнәм. Менә шулай да була икән", - ди Радик Юльякшин үзе.

Ул концерт залын тикшергән полицейскийларны да төшереп алган.

"Министрлык мəгълүматлары буенча, билгесез номерның хуҗасы психологик диспансерда исəптə торган кеше булып чыкты. Тикшерү эшлəре булачак. Хокук бозучының опекуннары административ җавап тотачак. Эчке Эшлəр идарəсе хезмəткəрлəренең əлеге ситуацияне тиз арада хəл иткəннəре өчен рəхмəтебезне белдерəбез. Килеп чыккан уңайсызлыклар өчен тамашачылардан гафу сорыйбыз", - дип сөйлəде "Элвин Грей" лейблының башкаручы директоры Семён Прошко.

("Интертат")