Алексей Песошин Мәскәү Сабан туенда катнашты

21 июльдә Мәскәүнең Коломенское музей-тыюлыгында Сабан туе узды. 200 мең квадрат метрлы мәйдандагы Сабан туен оештыруда Яр Чаллы шәһәре ярдәм күрсәткән. Бу хакта Татарстан Хөкүмәте матбугат хезмәте хәбәр итә.

Бәйрәмдә Татарстан Премьер-министры Алексей Песошин, Яр Чаллы мэры Наил Мәһдиев катнашты.

Сабан туе мәйданында алты сәхнә эшләгән. Алар һәркайсы Дөньяның төрле почмагын тасвирлаган. Моннан тыш, татар һәм башкорт утарлары урнаштырылган. Ярминкә оештырылган, аттракционнар куелган.

Бәйрәмдә Олимпия чемпионы Алинә Заһитова да чыгыш ясаган. Шулай ук танылган артистлар Айдар Галимов, Фирдүс Тямаев кебек җырчылар да концерт программаларын тәкъдим иткән. Ренат Ибраһимов, Эльмира Кәлимуллина кебек танылган артистлар чыгышларын да күрергә мөмкин булган.

Кунаклар өчен махсус 2018 килограммлы чәкчәк пешерелгән.

Россиядә иң зур Сабан туйларның берсе саналган Мәскәү Сабан туенда ел саен 200 меңләп кеше катнаша.

("Татар-информ")