2024 ел юллар салу буенча рекорд белән тарихка керәчәк

Без ел ахырына аның нәтиҗәсен чыгара башлыйбыз. Әгәр дә төзелеш буенча карасак, 2024 - һичшиксез юллар салу буенча рекорд белән тарихка керәчәк! Быел Татарстанда юл төзелешенә 83 миллиард сум акча юнәлтелде. Узган ел ул 250 миллиард иде. Аның зур өлеше Федераль дәрәҗәдәге М12 юлы. 2022дә - 206 млрд тотыла. Димәк, соңгы 3 елда безнең Республикада ярты триллион сумлык яңа юллар барлыкка килде. Моннан да зур сан илнең башка төбәгендә бар микән? Рөстәм Миңнеханов сүзе белән әйтсәк, Татарстан тарихында беркайчан да моның кадәр һәм мондый яңа технологияләр белән юл төзегәннәре юк иде. Ким дигәндә алдагы 5 елда мондый инвестицияләр булмаячак та.

Ел ахырына Татарстанда барлык планлаштырылган юллар да ачылып бетәргә тиеш. Бу атнада аларның өчесен кулланылышка тапшырдылар. Вице-премьер, якташыбыз Марат Хөснуллин әйтмешли, хәзер Татарстан - илнең иң зур сәүдә хабына һәм транспорт  төененә әйләнә. Ә юллар - икътисадның барлык юнәлешләре үсешенә этәргеч бирә торган фактор. Алар Республиканың алдагы дистә елларга үсешен тәэмин итәчәк. Олы юлларның һәркайсыбыз тормышына йогынтысын Рузәл Шәрипов бәяләде.  




Источник: https://tnv.ru/tat/news/kazan/433707-2024-el-yullar-salu-buencha-rekord-bel-n-tarikhka-ker-ch-k/