Җәй бетте: Татарстанда -5 градуска кадәр суыта

Кичә, 22 сентябрьдә, көн белән төн тигезләшкән вакытта, метеорологик җәй тәмамлангач, Татарстанга чын көз килде. Һава температурасы сизелерлек түбәнәйде. ТР Гидрометеорология үзәге белгечләре якындагы көннәргә үз фаразын бирде.

Синоптиклар фаразына караганда, бүген Татарстанда төньяк-көнбатыш җиле күтәреләчәк. Аның көче 14 м/с ка җитәчәк. Явым-төшемнәр көтелми.

Төнлә 0..+5 градуска кадәр суыта, урыны белән һавада һәм туфракта 0..-2 градуска кадәр өшетә (Казанда +3..+5 градус, түбән урыннарда 0..+ 2 градус). 23 сентябрь көндез ТРда +10..+15 градустан да югары булмаячак (ТР башкаласында +12..+14 градус).

24 сентябрьдә җил 1-6 метрга кадәр тына. Аңа да карамастан, һава температурасы тагын да түбәнәячәк.

Төнлә һәм иртән 0..-5 градуска кадәр, кайбер районнарда 0..+3 градус (Татарстан башкаласында +1..+3 градус, түбән урыннарда һавада һәм туфракта 0..-1 градуска кадәр кырау фаразлана). Көндез һава +12..+17 градуска кадәр җылыначак (Казанда +13..+15 градуска кадәр).

Фото: pxhere.com
Источник: https://tnv.ru/tat/news/tatarstan/416562--y-bette-tatarstanda-5-graduska-kad-r-suyta/