Җиңүнең 80 еллыгы нинди мөһим мәсьәләләрне күтәртә?

Россиядә Ватанны саклаучы елы башланып китте. Бөек Ватан сугышында Җиңүнең 80 еллыгын билгеләп үтәчәкбез. Узган атнада Республика халкының аңа керткән өлешен тагын бер кат ассызыклаучы яңалык килеп иреште. Президент Владимир Путин карары белән, Яшел Үзән - "Хезмәт даны шәһәре" статусын алачак. Әлегә кадәр ул исем Казанда гына бар иде.

Бүген ил буенча, сугышта катнашкан 7 мең әби-бабай калган. Аларның 120се Татарстанда яши. Төбәк башлыклары, шәһәр мэрлары һәр фронтовикны исемләп белергә тиеш, диде Владимир Путин. Һәрберсенең хәл-әхвәлен белергә кушты. Бәйрәмгә кадәр ветераннарга өстәмә акча түләнәчәк. Бүләкне беренче тапкыр алучы категория дә бар. Әйтик, шушы исемлеккә - саклану корылмаларын төзүчеләр кертелгән. Татарстан өчен тарихи объект - Казан каймасы. 1941нче елда СССР зур 100 шәһәрне немец һөҗүменнән саклау өчен каймалар төзү карарын кабул итә. Авыр хезмәткә халыкны мобилизациялиләр. Республикада 3 ай ярымда 331 чакрым окоп казыла. Анда катнашучыларның тылда бәяләнеп тә бетмәгән каһарманлык тарихы бар.

Без - сугыш тарихын китап белән кинодан түгел, бабаларыбыз сөйләгәннән белеп үскән ахыргы буын. Тагын берничә елдан ышанычлы чыганак булып архив документлары гына калачак. Ә тарихи хакыйкатне саклау - буыннан буынга күчәчәк амәнәт тә ул.