“Без олы юлга чыгарга әзер!” – “ШАЯН ТВ”да матбугат конференциясе узды

Бүген 7 ноябрьдә «Яңа Гасыр» телеканалы бинасында «Шаян ТВ» татар балалар телеканалы аерым канал булып эфирга чыга башлау максатыннан матбугат очрашуы узды.

«Безнең хәзерге максатыбыз — тиз вакыт эчендә бөтен җирдә дә булу», — ди ТНВ каналының генераль директоры Илшат Юныс улы Әминов.

«Бу безнең өчен шатлыклы минутлар. Күп кеше ник интернетта гына чыкмыйсыз дип кайтаваз яңгыратты. Телеэкраннарга чыгуыбыз, анда булу зур роль уйный. Төп максат — татар мохитен булдыру. Бездә креатив һәм тәҗрибәле яшьләр, балалар эшли», — диде «ШАЯН ТВ» каналы башкарма директоры- баш мөхәррир, Рамилә Әхмәтзакир кызы Сәхабетдинова.

Журналистлар беренчеләрдән булып «Шаян ТВ» сайты белән дә танышты.

Очрашуда каләм әһелләре яңа канал турында үзләрен кызыктырган сорауларга җавап таптылар. Заманча балалар сайты белән танышканнан соң каналда чыгачак яңа тапшырулар тәкъдим ителде. Илшат Әминов ассызыклаганча, «ШАЯН ТВ» балаларга актуаль һәм кызыклы булган контент җиткерә торган компанияләр белән эшләргә теләк белдерә.

Матбугат очрашуы дәверендә ТНВ каналына кагылган сораулар яңгырады. Мәсәлән, татар фильмнарын төшерү. ТНВ каналының генераль директоры Илшат Әминов елына 2 яңа татарча фильм чыгачагы турында әйтте.

Исегезгә төшерәбез, 12 ноябрьдә «ШАЯН ТВ» кабель челтәрләрендә күреп булачак.