"Шөпшә Шоу" дует түгел, ә трио!

"Болгар радиосы" эфирында уңышлы тапшырулар күп һәм аларның һәркайсы үз тыңлаучысын тапты. Безнең радиодулкыннарда баручы сәхифәләр, программалар шуның белән дә аерылып тора - алар озын гомерле. "Нокта", "Хак Дин", "Татар мәйданы" тапшырулары инде 3 елга якын "болгар радиосы"нда эшли. Шундыйларның берсе - "Шөпшә Шоу". Үзгә фикерле, кыю сүзле Линар Закировның "Болгар радиосы" уздырган кастинг аша әлеге тапшыруга килүе дә  "Шөпшә" ләрнең образы формалашуга зур йогынты ясады. Айсылу да, Линар да кунакларга көтелмәгән сораулар биреп, аларны уңайсыз хәлгә калдыра, ә инде радиотыңлаучыларыбыз белән уртак фикергә килгәнче бәхәсләшә иделәр. Әмма үзгәрешләр барыбызга да хас булган кебек, алар  "Шөпшә Шоу"ны читләтеп узмадылар. Гыйнвар аенда Линар Закиров радиоэфирыннан китергә булды һәм шул көннән Айсылу Хаҗиева яңа тандем булдыру фикере белән яна башлады. Яңа алып баручы роленә күпләр тәкъдим ителде, әмма сайлап алу этабын узучылар булмады...
"Мөһәммәд янына таулар да килгән вакытта, ник әле "Шөпшә шоу"ны бераз үзгәртмәскә?" дигән фикер бик вакытлы булып чыкты һәм исемен калдырып, җисемен үзгәртергә керештеләр. Яңа тапшыруга яңа алып баручы табу хәзер аның кадәр авыр булмады. Җырлы, мәзәкле, шаярулы, үзгәртеп корылган "Шөпшә Шоу"га Рәсим Фәсихов туры килеп тора иде. Радиотыңлаучыларга ул үзен шаян, аралашучан, ачык күңелле алып баручы буларак  "ЧәкЧәк Шоу" проектында ук танытырга өлгергән иде. "Шөпшә Шоу"да исә аның үз роле, үз образы булачак. Моңа өстәп тапшыру яңа сәхифәләр, уеннар белән дә баетылды. "Кунаклы" өлештә "төртмәле" сораулар, "катлаулы" биремнәр пәйда булды. Тыңламый калмагыз! 
Әйе, "Шөпшә Шоу" хәзер дует түгел, ә трио...Анда баян да бар!