"Сагыну" флешмобында "Болгар радиосы" алып баручылары да катнаша!

“Болгар радиосы” Татарстанның халык артисты Әлфия Авзалова истәлегенә багышланган “Сагыну” флешмобын башлап җибәрде.Һәм әлеге флешмобта "Болгар радиосы" алып баручылары да бик теләп катнаша. Алар Әлфия апа белән бәйле хатирәләрен Инстаграм челтәренә урнаштырачак һәм флешмоб эстафетасын берсеннән-берсенә бирәчәк. Беренче булып "Сагыну" флешмобын Наилә Гыйбадуллина башлап җибәрде.
Һичшиксез, Әлфия апа һәркем өчен үзенеке: кем өчендер сердәшче, кемгәдер киңәшче, юатучы, кумиры һәм тормыш маягы... Аңа әйтергә теләгән сүзләрегезне, җырчыбыз белән бәйле хатирәләрегезне сез дә “Болгар радиосы”на юллый аласыз.
Күңел кылларын аеруча тибрәткән хатлар “Болгар радиосы” эфирында яңгырар, ә тулы хатлар радионың рәсми сайтында урын алыр һәм газеталарда басылып чыгар.
Эчтәлеге белән беркемне дә битараф калдырмаган хатлар 17 нче октябрь көнне “Пирамида” концертлар залы сәхнәсеннән Әлфия Авзалованың якты истәлегенә багышланган “Сагыну” исемле хәтер кичәсендә укылачак.
Тетрәндергеч һәм олы хатирәле хат юллаучылар Әлфия Авзалованың якты истәлегенә багышланган “Сагыну” исемле хәтер кичәсенә чакыру билетлары белән бүләкләнәчәк - “Болгар радиосы” 17 октябрьдә “Пирамида” концертлар залында Татарстанның халык артисты Әлфия Авзалова истәлегенә багышланган “Сагыну” исемле хәтер кичәсен үткәрә.