Наилә Гыйбадуллина "Иң яхшы мәгълүмати радиотапшыру" номинациясендә җиңде!

18 декабря 2018 "Болгар радиосы" яңалыклары

"Болгар радиосы"нда "Киңәшле эш" тапшыруын алып баручы Наилә Гыйбадуллина ТР Студентлар отряды яшьләр хәрәкәтенең 55 еллыгы уңаеннан уздырылган конкурста катнашып җиңүгә лаек булды. Ул "Иң яхшы мәгълүмати радиотапшыру" номинациясендә бүләкләнде.

Коллегабызга конкурсның жюри рәисе Римма Ратникова имзалаган диплом, акчалата премия һәм чәчәк бәйләме тапшырылды.

"Ничә радио арасыннан "Болгар радиосы"н сайлап алулары һәм минем эшемә шундый зур бәя бирүләре - зур сөенеч! Әлеге вакытта әйтеп бетергесез хисләр кичерәм! "Киңәшле эш" тапшыруы 3-4 ай гына эшләсә дә, зур игътибарга лаек булды, шунысы аеруча шатлыклы", - дип сөйләде Наилә Гыйбадуллина. Моңа кадәр Наилә "Уңыш формуласы" тапшыруы белән төрле бәйгеләрдә катнашып җиңү яулаган иде.

Коллегабызны җиңүе белән котлыйбыз! Иҗади уңышлар, яңа үрләр телибез!