Муса Җәлил исемендәге опера һәм балет театр сәхнәсе пәрдәсе "Болгар радиосы" тыңлаучылары өчен дә бераз гына ачылып китте…

6 марта 2017 "Болгар радиосы" яңалыклары

Бүген "Болгар радиосы" эфирында "Сәхнәдәш" тапшыруында  яшь, талантлы, өметле гүзәл затларның берсе булды! Ул - Муса Җәлил исемендәге опера һәм балет театры артисты Айсылу Мирхафизхан!
Балериналар алар башка дөнья кешеләре булып күз алдына килә. Тал чыбыгыдай сыгылмалы, мамыктай җиңел гәүдә, һәрвакытта та югары күтәрелгән баш һәм озын, матур куллар…Алар әйтерсең лә фарфор статуэтка булып киштәдә озак вакыт торганнан соң, безнең арага төшкәннәр: хәрәкәттә – грация, сөйләмдә – ягымлылык, күзләрдә – уйчанлылык.   Ә иң мөһиме балериналарда аларныкы гына булган пуантылар  бар. Беренче карашка әлеге аяк киеме матурлык символы булса, икенче яктан авыр хезмәт шаһитлары…Шулай итеп, бүген «Болгар радиосы»нда  чын балерина булды.
«Иртән торырга күнеккән. Театрда эшебез 10да башлана, шуңа да йокы туйдырырга вакыт юк. Әле бассейнга да барырга өлгерергә кирәк! Алайса организмым «Айсылу, син мине оныттың, ахрысы» диеп сигналлар бирә башлады дип Айсылу Мирхафизхан сүзен башлап җибәрде. Әңгәмәне алып барган «Болгар радиосы»  алып баручысы Айгөл Хәйруллина исә гәҗиттә басылып чыккан мәкаләне кулына алып, укып җибәрде. Анда шулай ук Айсылуның кечкенәдән үк тыңгысыз бала булуы турында язылган иде,баксаң балеринабыз бала-чактан ук ике генә түгел, ә 3 куянның койрыгын берьюлы тотарга өйрәнгән.  Үсмер чакта 3 мәктәпкә йөреп белем алган кызның бүгенге көне дә секунды-минутына кадәр планлаштырылган. Бу арада исә тиздән узачак әнисе , ТР халык артисты Фәридә Сафина,  юбилеена әзерләнеп йөрүләре икән. «Әнием белән яңа рольләрне бергә өйрәнәбез: күп санлы постановкаларны карыйбыз, яңа хәрәкәтләр үзләштерәбез, хаталар өстендә эшлибез. Әни ул минем укытучым да, тәнкыйтьчем дә. Театрда узган репетицияләрдә әни белән өйрәнгәннәрне күрсәткәч, укытучылар да мактый үземне» диеп тыйнак итеп кенә елмая Айсылу.
Шулай итеп серле һәм могҗизалы балет дөньясы, Муса Җәлил исемендәге театр сәхнәсе пәрдәсе 6 март иртәсендә  безнең өчен  дә бераз гына ачылып китте…