Могҗизалы Яңа ел төне “ТНВ” каналында

"Татарстан - Яңа Гасыр" телевидениесе Яңа ел төнендә күрсәтеләчәк бәйрәм тапшыруын инде әзерли башлаган. Быел телевизор караучыларны тылсымлы, әкияти сюжетлы  кичә көтә. Яңа ел төнең "ТНВ" каналы тамашачыларны Габдулла Тукайның геройлары белән бергә каршы алырга чакыра.
Спектакльнең сценариясе аңлаешлы, гади, кызыклы, чөнки әлеге Яңа ел әкиятендә яхшы таныш персонажлар – “Шүрәле”, “Су анасы”, “Былтыр”, “Дию пәрие” һәм “Убырлы карчык” образлары бар”.
Спектакльдә төп рольләрне “Мунча ташы” актерлары Гамил Әсхәдулла,  Рөстәм Рахманкулов һәм Рөстәм Хәсәнов башкарачак.
Сценарийның сюжеты буенча, “Шүрәле” һәм “Су анасы”, фирмалары урманда Яңа ел бәйрәмен үткәрү мөмкинлеге өчен көрәшә. Җитәкчелек аларга бәйрәмне бергә  эшләргә киңәш итә, ләкин, “Убырлы карчык” аларның араларын гел бозарга гына тора.  
Әлеге ике конкурент фирма арасында  нәрсәләр булып бетәр икән? Убырлы карчык араларын боза алырмы? Яңа ел төне-өметләр вакыты. Бәлки бу могҗизалы бәйрәм төне дә ике конкурент фирманы дуслаштыра алыр? Моны инде Сез 31 декабрь көнне “ТНВ” каналында күрсәтеләчәк бәйрәм тапшыруында белә алырсыз! Яңа елны “Татарстан - Яңа Гасыр” каналы белән бергә каршы алыгыз!
Моннан кала,  бәйрәм төнендә тамашачыларның  Хәния Фәрхи, Айдар Галимов, Илсөя Бәдретдинова, Раяз Фасыйхов, Зөфәр Билалов,  Ришат Төхвәтуллин, Филюс Каһиров кебек  татар эстрадасының иң якты йолдызларын  күрү мөмкинлеге дә булачак.