Мәктәпләрдә һәм югары уку йортларында урнашкан сайлау участокларында сайлаучылар укучылар белән очрашмаячак.

Эш тәртибе укучыларга зыян килмәслек итеп оештырылган. Бу хакта Бердәм мәгълүмат үзәгендә Татарстан Үзәк сайлау комиссиясе рәисе Андрей Кондратьев хәбәр итте. Аның сүзләренчә, участоклар 648 мәктәптә һәм вузда эшләячәк. Һәр белем бирү учреждениесе җитәкчесе сайлаучылар һәм укучылар очрашмавын кайгырта. Андрей Кондратьев мәктәпләр штатлы режимда эшләвен, бары тик расписаниедә махсус төзәтмәләр кертелүен әйтте. «Каядыр дәресләр саф һавада, спорт объектында, музейда уза. Мәгариф министрлыгы бу сорау белән шөгыльләнә. Бүген дә берничә белем учреждениесенә барачакмын», — диде. «Белем бирү учреждениесендәге сайлау участогы — иң куркынычсыз урын. Анда термометрия үтмәгәннәрне кертмиләр, тулысынча дезинфекция үткәрелә. Шуңа күрә проблемалар күрмим», — диде Андрей Кондратьев. Шулай ук Татарстан Үзәк сайлау комиссиясе рәисе сүзләренчә, Республикада сайлауларда 20 меңгә якын күзәтүче катнашачак.

Фото: Солтан Исхаков 
Чыганак: ТАТАР-ИНФОРМ