Халыкара хатын-кызлар көне якынлаша!

Ир егетләребез "Болгар радиосы" кызларын якынлашып килүче Халыкара хатын-кызлар көне белән котлады!  Татарстанның халык шагыйре, язучы Разил Вәлиев "Болгар" кызлары өчен махсус шигырь дә язган:

"Кояш сеңгән 
каен бөресендә
Яз төсмере 
инде күренә...
Сезнең өчен 
иң кадерле сүзләр
Ургып чыга 
күңел түреннән.

Ул сүзләрне 
кояш нуры белән
Язам бүген 
язгы бозларга...
Боз эретеп 
яз китергән өчен
Рәхмәт Сезгә - 
хатын-кызларга!

Рәхмәт Сезгә 
җәй китергән өчен,
Җан җылысын сибеп дөньяга.
Без һәммәбез, 
кош баласы кебек,
Яшибез бит 
Сезнең ояда.

Көзләр җитә, 
кышлар узып китә,
Очар кошлар кайта ерактан.
Ходай Сезне 
җиргә җан өрүче
Язгы назлар итеп яраткан".

Ул гына да түгел! Менеджер Алмаз Вәлиев та шигырьләр яза икән. Хатын-кызларга багышланган шигырен ул да яңгыратты.

Җыр-моңга, уен-көлкегә бай тамаша булды! Рәхмәт егетләр!

"Болгар радиосы"ның матбугат хезмәте