"Казан -Болгар" веломарафоны югары дәрәҗәдә үтте!

Кичә, 2 нче август көнне, 3-нче “Казан –Болгар” веломарафоны узды. Бу елны “Татарстан – Яңа Гасыр” компаниясе 15 ел тулганга күрә, бу эстафета да әлеге зур матур датага багышланды.
Иртәнге 5.00 Казан Кирмәне янында инде тормыш кайный иде. Репортерлар, корреспондетлар, велосипедлар һәм велоэстафетаның геройлары – марафончылар. Һәр елдагыча “Казан – Болгар” велоэстафетасын үтәргә “Болгар радиосы” алып баручылары, ди-джейлары, хезмәткәрләре һәм , әлбәттә, җитәкчеләре җыелган иде. Әмма “Казан – Болгар” веломарафонын “Болгар радиосы” оештырса да, телеканал да читтә калмый. Инде икенче ел рәттән марафончылар рәтендә “Татарстан – Яңа гасыр” телеканалының продюсеры Гиниятов Данил Шамил улы да булды. Бу елны исә ул Казан – Болгар маршрутын тулысынча узды, төгәлрәге, 200 чакрым араны велосипедта барды. Билгеле, “Татарстан – Яңа Гасыр” телерадиокомпаниясенең генераль директоры Әминов Илшат Юныс улы «Казан –Болгар» велоэстафетасын, гадәттәгечә, башлап җибәрде.
Елдан ел “Болгар радиосы” оештырган “Казан-Болгар” велоэстафетасы популярлаша. Узган елны алып баручылар белән бер рәттә бары тик Илсөя Бәдретдинова гына барган булса, бу елны инде велосипед өстендә Вил Усманов, Дилә Нигъматуллина, Зинира - Ризат Рамазановлар, Гүзәлем - Салават Миңнеханов, Дилия Әхмәтшина һәм кабаттан Илсөя Бәдретдинова иделәр.
Инде 18.00 дә Болгар шәһәрендә, Ак мәчет янындагы мәйданда концерт башланды. Әлки, Балык Бистәсе, Кайбыч, Балтач районнарыннан килгән тыңлаучыларыбыз , тамашачыларыбыз бар иде. Татар эстрадасының танылган җырчылары катнашында узган концерт 2 сәгать дәвам итте һәм керү бушлай иде.
Елның иң көтелгән чарасы шулай бер мизгел булып узып китте. Киләсе елга “Казан –Болгар” веломарафоны зуррак масштаб алып дәвам итәчәк!