Индирасыз "Иртәнге чәй"

- Индира,“Иртәнге чәй” башланган бирле, бер дә алышынмыйча эшләгән бердәнбер алып баручы ул син. “Болгар радиосы”нда ничә ел эшләдең?

- Иң беренче эфирым 2017 елның 4 октябрендә булды. 3 ел ярым булып чыга

- 3 ел дәверендә үзеңдә нинди үзгәрешләр сиздең?

- Профессиональ яктан үстем, камилләштем дип саныйм. Башлангыч чордагы Индира һәм бүгенге көндәге Индира – ул бер үк кеше. Әмма профессиональ яктан аерма шактый зур.

- Егетләр белән тапшыру алып баруы, эшләве кыенлыклар тудырмый идеме?

- Юк, күпме генә алып баручы алышынса да, алар белән эшләве бик җиңел бирелде. Кечкенәдән миңа егетләр белән уртак тел табуы да җайлырак иде, чөнки алар гадиерәк булалар.

Иртәнге шоуда эшләүнең 3 плюсын һәм 3 минусын ата әле?

Плюслар:
- син бөтен Татарстанны уятасың,
- кайбер кунаклар тәмле күчтәнәчләр алып килә (көлә),
- бөкеләр юк,
Минусы бер генә:
- йокы туймый,
- йокы туймый,
- йокы туймый,

- Китүнең сәбәбе нинди?

- Әйтмим

Гомумән алганда хәзер организмны рәткә китерер вакыт. Иртән торырга гомумән яратмыйм, чөнки мин “ябалак”. Яраткан эшем булган өчен генә иртәнге биштә торып эшкә бара идем.

- Киләчәккә планнарың белән бүлеш әле?

- Бүгенге көндә мин “Шаян ТВ” каналында редактор булып эшлим, ул эшемне дә бик яратам, Аллагашөкер. Икенчедән, “Алдан кычкырган күкенең башы авырта”, диләр. Анысы сер булып калсын әлегә.

- Индира, без сиңа үз чиратыбызда киләчәктә зур уңышларга ирешүеңне, һәрвакыт үсешкә омтылуыңны һәм үз максатларыңа ирешүеңне теләп калабыз!

- Рәхмәт!