Илфар Кәримов: “Туйның икенче көнендә килен мунчасы булды”

14 июльдә “Болгар радиосы”ның баш мөхәррире, продюсеры Илфар Кәримов белән радионың реклама бүлеге менеджеры Гөлинә Габдрахманованың туе булды. Кәримовларның беренче гаилә бәйрәме кайда һәм ничек узган? Бу хакта безгә Илфар үзе сөйләде.

“Туй көнебез иртән Казанда фотосессия белән башланды. Аннан соң яраткан эш урыныбыз – “Болгар радиосы”на барып килдек. Язылышу тантанасы Сабада, туебыз Сабаның “Ильвина” ресторанында гөрләп узды. Бик күңелле үтте, барысы да без теләгәнчә булды! Мәҗлескә 130га якын кунак килде, бу – иң якын һәм кадерле кешеләребез. Туйны Ирек Фатыйхов алып барды. Артистлардан дусларыбыз Зинира һәм Ризат Рамазановлар бар иде. Җырчыларны махсус чакырмадык, чөнки туйдан концерт ясарга теләмәдек”, - диде Илфар Кәримов.

Бүген - туйның икенче көне. “Туган ягым Сабада килен мунчасы булды. Барлык йолаларын туры китереп үткәрдек. Киләсе атнада килен токмачы булачак, Алла боерса. Бүген дуслар белән табигать кочагына җыенабыз”, - диде Илфар Кәримов.

Аның әйтүенчә, яшьләр ширбәт аен соңрак үткәрергә тели. “Сентябрь аенда җылы якка барырга планлаштырабыз, Алла теләсә”, - диде Илфар. Кәримовлар Казанда үз фатирларында торачак.

Яшьләрне тагын бер кат чын күңелдән котлыйбыз! Гаилә бәхете һәм иминлек телибез!