“Болгар радиосы”нда яңа проект – “Театр тавышы”!
Апрель аеннан һәр шимбә һәм якшәмбе көннәрендә “Болгар радиосы”нда “Театр тавышы” дип исемләнгән уникаль проект старт ала. Аның мөхәррире – Миләүшә Кашапова.
“Әлеге проект быел Россиядә игълан ителгән Театр елына багышлана. Аның төп максаты – татар театрларында яңгыраган җырларны тыңлаучыга ишеттерү. Бу җырлар “Болгар радиосы”ның алтын фондында саклана, ул еллар дәвамында халык җырларына әверелгән әсәрләрне үз эченә алган. Биредә 50нче еллардан бирле тупланган кабатланмас җырлар бар”, - дип белдерде Миләүшә Кашапова.
“Театр тавышы” тарихны җыр аша чагылдыра. Әмма бу проектта элек язылган җырлар гына түгел, хәзерге заман җырлары да яңгыраячак. Проектның уникальлеге дә шунда. “Бүгенге көндә республика театрларында куелган спектакль җырларын беренче тапкыр “Болгар радиосы”нда ишеттерәчәкбез. Шуны да әйтергә кирәк, без башкала театрлары белән генә чикләнмибез, аларны болай да яхшы беләләр. Без тыңлаучыларыбызны җирле театрлар һәм аларның артистлары белән таныштырырга телибез”, - диде Миләүшә Кашапова.
“Театр тавышы” проекты һәр шимбә һәм якшәмбе көннәрендә 9:15, 13:24, 18:30 сәгатьләрдә эфирга чыгачак.
