“Болгар радиосы”нда Яңа ел төнендә кайсы алып баручы эшләячәк?

Быел Яңа ел төнендә “Болгар радиосы” эфирында “Хак дин” һәм “Татар мәйданы” тапшыруларын алып баручы Фаил Гыймадов эшләячәк. Фаилнең моңа күңеле төшкәнме яки, киресенчә, сөенгәнме икән? Үзеннән сорадык.

“Милади елы буенча яңа ел исәпләве башлана. Әле тагын Хиҗри ел исәпләве бар бит. Халык Яңа ел дип шау-шу килә, зур шаукым куптара. Балачакта кызык иде ул, ә өлкәннәрнең Яңа ел дип йөрүләре сәеррәк. Бәяләр артып торган заманда кешеләр нәрсәгә шатлана икән?

Ялгышмасам, өченче ел рәттән Яңа ел төнендә эшлим. Башка эфирлардан бернинди үзенчәлеген дә күрмим. Эфирда яраткан тыңлаучыларым белән үзем генә булу күңелле дә әле. Төрле интерактив уеннар планлаштырам.

Гомумән, һәр иртәдә уяну, яшәү минем өчен Яңа ел дәрәҗәсендәге зур шатлык. Һәр көнне исән-сау булуым, изгелекләр эшли алу бәхете, сулый алуым, якты дөньяны күрү, үз аягың белән йөри алу минем өчен зур бәхет. Барыбызга да Яңа елда гына түгел, һәр көнгә сөенеп яшәргә, шушы нигъмәтләрнең кадерен белеп яшәргә насыйп булсын”, - диде Фаил Гыймадов.