“Болгар радиосы” милли музыка премиясен тапшыру тантанасы якынлаша!

Татар халкында зур эшкә алдан ук әзерләнә башлау - электән килгән гадәт. Шуңа да безнең милләттә «хәстәрен алдан күреп куй» мәгънәсен үз эченә алган мәкаль һәм әйтемнәр күп. Тиздән моннан нибары 5 ел элек кенә барлыкка килеп, моңа кадәр татар дөньясында дан тоткан зур тамашаларны күләгәдә калдырган “Болгар радиосы” милли музыка премиясен тапшыру тантанасы якынлаша!
Болгар радиосы” милли музыка премиясе быел 5 нче тапкыр үткәреләчәк һәм ул башка  тамашалардан аерылып тора, ул бер баш өстен! Ни өчен дисәгез, "Милли  музыка премиясе” - халык фикерен исәпкә алып уздырыла торган тантана. “Кайнар хит” тапшыруында җиңгән җырлар, “Болгар радиосы”на килгән SMS-хәбәрләр, котлауларда соралган җырлар –боларның берсе дә игътибардан читтә калмый. Тамашачы үз фикерен белдерә, ә проект җитәкчеләре, нибары,  халык сайлаган җырларны барлыйлар гына.
Шунсын да әйтеп узарга кирәк,  “Болгар радиосы”ның әлеге проектта  функцияләре бик күп. Шуларның берсе – йөрәкләргә үтеп кергән халыкчан һәм моңлы җырлар белән “Алтын фонд”ны баету. Шуның белән беррәттән, халкыбызның яраткан җәүһәрләрен данлау һәм яңа йолдызларга юл ачу премиянең мөһим бурычларыннан санала. “Болгар радиосы” татар эстрадасында яңгырап, тамашачы күңелендә урын тапкан җырлар өчен “Алтын фонд”ка күпер булып тора.

Бүгеннән шунысын тәгаен әйтеп була: Милли музыка премиясенең киләчәге якты! 9 нчы декабрь көнендә һәрбарчагызны да КРК "Пирамида"да көтеп калабыз! Җыр - моң бәйрәмендә бергә булыйк!