"Болгар радиосы" милли музыка премиясе лауреаты Ильяс Халиков: "Президентыбыз дини җырлар башкаруны хуплый".

"Татар мәйданы” тапшыруында кунакта дини җырлар башкаручы, педагогика фәннәре кандидаты, “Мөнбәр” татар-дини театры җитәкчесе, «Болгар радиосы» милли музыка премиясе лауреаты Ильяс Халиков булды. Әңгәмә исә четерекле темаларның берсенә багышланды. Җырлар һәм дин бергә үрелеп бара аламы? Шуны да искә төшереп үтәбез, Ильяс Халиковның эшчәнлеген Татарстан Республикасы президенты Рөстәм Миңнеханов үзе хуплаган. Ильяс бу очрашу турында бик ачылып сөйләде: «Мине, мөнәҗәтләр башкаручы буларак, бу чарага тәкъдим иттеләр. Ризалашып бардым һәм Рөстәм Нургалиевич белән шәхсән танышу бәхетенә ирештем. Дини җырлар башкаруны хупласа да, дин һәм эстраданы кушарга да, бутарга да ярамый диеп кисәтү дә ясады». Шунсын да әйтергә кирәк, бүгенге көндә никах мәҗлесләрендә ешрак көйгә салынмаган җырларны ягъни мөнәҗәтләр башкаруны сорыйлар. Ләкин шул ук вакытта кызыл туйларын заманча рухта үткәрүчеләр дә юк түгел, андый мәҗлесләрдә дини җырлар башкарам».
Шулай әңгәмә дәвамында фән һәм дин проблемалары турында сөйләшенде һәм күп кенә шалтыратучыларыбызның сорауларына җаваплар эзләнде. Әгәр дә тапшыруыны тулысынча тыңлый алмган булсагыз, «Аудио-архив» битендә «Татар мәйданы»н кабаттан тыңлау мөмкинлеге бар.