Азат Абитов Гөлсирин Абдуллинага тәкъдим ясады!

Кичә Казанда узган "Вагаповфест йолдызлары" концертында Азат Абитов Гөлсирин Абдуллинага тәкъдим ясады.

Бу хәл концерт вакытында булды. Азат куеныннан йөзек чыгарып, тезләнде һәм Гөлсириннән: "Син миңа кияүгә чыгарга ризамы?" - дип сорады. Гөлсирин: "Риза!" - диде. Бу хәлгә барлык тамашачылар шаһит булды. 

Дөресен генә әйткәндә, Азат белән Гөлсирин арасында мәхәббәт барлыгын күптән сиздек. Ләкин яшьләрнең икесе дә сер йомгагын чишмәде, барысын да имеш-мимешкә сылтады. Инде монысы да пиар түгелме икән, дигән шик-уйлар белән бүген "Иртәнге чәй"ләр туры эфирда Азатның үзенә шалтыратты. 

"Һәрвакыт имеш-мимеш булмый инде. Кичәге хәл чын хәл булды! Бу адымны күп һәм озак уйладым, Гөлсирингә сиздермәскә тырыштым. Шуңа күрә ул белмәде. Эмоцияләре мин көткәнчә булды, ләкин Гөлсиринне акырып елар дип уйлаган идем. Булмады!.." - дип сөйләде Азат Абитов "Болгар радиосы"на.

Яшьләрне чын күңелдән котлыйбыз! Бәхетле киләчәк телибез!