“Бәллүр каләм – 2017” XX бәйгесендә “Тукайның тууына – 130 ел” махсус проект номинациясендә "Болгар радиосы" җиңү яулады!

Татарстан Республикасы журналистика һәм массакүләм мәгълүмат чаралары өлкәсендә “Бәллүр каләм – 2017” XX бәйгесе номинантлары билгеле булды. Менә алар:

“Тукайның тууына – 130 ел” махсус проект номинациясендә:

1. Илзирә Юзаева, “Яңа Гасыр” телеканалы (Казан)
2. ”Татарстан” ГТРК радиосы (Казан)
3. ”Болгар” радиосы” (Казан)
4. “Мәгариф” журналы (Казан)
5. ”Казан утлары” журналы (Казан)
6. ”Безнең мирас” (Казан)

Шунсын да игъбарсыз калдырырга ярамый, "Тукай эзләре буйлап" исемле тиңе булмаган акция 2016 елда старт алды. "ЧәкЧәк Шоу" иртәнге тапшыру алып баручылары Габдулла Тукай музее белән бергәлектә Арча районына, бөек шагыйребезнең туган җирләренә сәяхәт кылды. Экскурсия вакытында музей экспонатлары күрсәтелде, "Болгар радиосы" алып баручылары килгән тамашачыларга Г.Тукайның иҗаты, тормыш юлы турында сөйләде. Кушлавыч-Өчиле-Кырлай авылларын үз эченә алган экскурсия уңышлы булып чыкты һәм аны 2017 елда да кабатларга булдык. Җомга көнне "Пирамида" күңел ачу үзәгенең сәхнәсенә "Бәллүр каләм" бәйгесенең дипломын алырга "Болгар радиосы"  җитәкчесе Наилә Хәйдәрова һәм "Болгар радиосы" алып баручысы Айгөл Хәйруллина күтәрелде. 

“Бәллүр каләм – 2017” XX бәйгесе номинантлары исемлегендә "Болгар радиосы"ның да булуы - безнең өчен зур шатлык һәм зур җиңү! Хезмәттәшләребезне ихлас күңелдән тәбрик итәбез, иҗади уңышлар, яңа үрләр яулауларын теләп калабыз! Горурланабыз!