Акчалар, саннар, процентлар...

2017нче елда россиялеләрнең реаль хезмәт хаклары артачак. Бу хакта илнең хезмәт һәм социаль мәшгульлек министры Максим Топилин хәбәр иткән. Ул ассызыклаганча, сүз номиналь күрсәткеч турында бармый. Россия газетасы хәбәрчесе белән әңгәмәсендә, Топилин, Россия президенты Владимир Путинның бюджет тармагында эшләүчеләрнең хезмәт хакларын финанслауны арттыру турындагы указын тормышка ашыру – хезмәт хаклары үсүендә мөһим роль уйнаячак. Эшсезлек үсмәячәк, ул узган елгы күрсәткечләр кысаларында тирбәләчәк, дигән министр.

Саннар, акчалар темасын дәвам итеп. Татарстанның эчке дәүләт бурычы узган елның 12 ае нәтиҗәләре буенча 2,3%ка үскән, ягъни 2 миллиард 100 миллион сум тәшкил итә. Бу хакта республиканың финанс министрлыгы хисабында әйтелә. Узган елның өченче кварталында дәүләт бурычы 1,5%ка кыскаруны күрсәтте. Элегрәк, финанс министры Радик Гайзатуллин 2016нчы ел нәтиҗәләре буенча республиканың дәүләт бурычы – 3 миллиард ярым сумга үсеп, 94 миллиард 800 миллион сум дәрәҗәсендә булуы көтелә, дип белдергән иде.