1. Үзеңне 3 сүз белән тасвирла.

Үткен, ягымлы, туры сүзле.

2. Яраткан ризыгың?

Ит һәм балыктан әзерләнгән  ризыкларны яратам.

3. 5 еллык сәяхәткә үзең белән кем яисә нәрсә алыр идең?

Эх, ма!! Бөтен гаиләмне алып китәр идем. Күбрәк акча алсаң, кирәген баргач та алып  була. 

4. Әлегә тормышка ашмаган хыялың?

Илләр гизәсем, сәяхәт итәсем килә!

5. Янган йорттан беренче булып нәрсәне алып чыгар идең?

Янган йортта кеше калмаган булса, документларны алып чыгу ягын карар идем. Аннары үзеңнең кем икәнеңне, милкеңнең синеке икәнен раслау озакка сузылырга мөмкин.

5. Көн саен эшләп тә, ялыктырмый торган шөгелең?

Тәмле ашау, озак итеп йоклау туйдырмас иде, дип уйлыйм.

6. Бүгенге көндә нинди максат белән яшисең?

Мин иң башта әни. Балаларым акыллы, иманлы, тәрбияле булсыннар иде дим. Киләчәктә ышанычыбыз бит алар. Алар өчен кызарырга язмасын.

7. Син сайлыйсыңмы әллә сине сайлыйлармы?

Мин белгән кадәре- мин сайлыйм. Мәсьәләнең икенче ягы да бар бит, мин белеп бетермәгәне.

8. Син беркайчан да башкармыячак эш?

Кеше рәнҗетүдән бик куркам. Ялганламыйм. Сорасалар, гел дөресен сөйлим. Сорамасалар, белсәм дә дәшмим.

9.  Җитәкче була алыр идеңме?

Мин өйдә җитәкче))

10.  Казаннан кала яшәү өчен тагын кайсы шәһәрне сайлар идең?

Белсәм икән, күрсәм икән мин ул шәһәрне.. Яшәр өчен җайлы, тыныч булган,  балалар өчен бөтен шартлар тудырылган, табигате матур, һава торышы гел салкын булмаган шәһәр.

11.  Нәрсә дә булса өчен сиңа оятмы?

Әлбәттә оятлы булган чаклар булды. Әнине үпкәлетеп, күкрәк киереп “үземчә эшләдем”,- дип йөргәнем өчен оят, кеше бакчасын басып, аннары  ул бакчаның хуҗасына әнинең: “минем кызым урлашып йөрми!”-дип әйткәне өчен оят, уйланылмый, кызып китеп эшләгән гамәлем өчен оят.